FIFA klublar o‘rtasidagi jahon chempionatini 48 ta jamoagacha kengaytirmoqchi.

The Times nashrining yozishicha, FIFAning ba’zi rahbarlari shu yozda AQSHda bo‘lib o‘tgan 32 jamoa ishtirokidagi debyut turnirda Angliya, Ispaniya va Italiya chempionlari - "Liverpul", "Barselona" va "Napoli" ishtirok etmaganidan norozilik bildirishgan.

Shu munosabat bilan, bir mamlakatdan maksimal jamoalar soniga qo‘yilgan cheklovlar turnirning keyingi mavsumidan boshlab yumshatilishi mumkin. Klublar o‘rtasidagi jahon chempionatida hozircha bir mamlakatdan faqat ikki jamoa ishtirok etishi mumkin.

FIFA klublar o‘rtasidagi jahon chempionatini 48 ta jamoagacha kengaytirishga urinib ko‘rishi mumkin, ammo UEFA bunga mutlaqo qarshi. Bundan tashqari, UEFA turnirni to‘rt yilda bir martadan ko‘proq o‘tkazishni qo‘llab-quvvatlamaydi, biroq bir mamlakatga ikki klubdan uchtagacha limitni oshirishga qarshilik qilmaydi.

Keyingi turnir 2029 yilda bo‘lib o‘tadi. Birinchi mavsumda "Chelsi" g‘olib bo‘ldi.