"Nottingem Forest" muxlislari allaqachon bosh murabbiy Ange Postekogluning iste’fosini kutishmoqda.

Avstraliyalik mutaxassis ushbu lavozimni 9 sentyabr kuni Nunu Eshpiritu Santu o‘rniga egallagandi. "O‘rmonchilar"ning yangi murabbiy qo‘l ostidagi natijalari havas qilgulik emas: to‘rt mag‘lubiyat, ikki durang va birorta ham g‘alaba yo‘q.

Payshanba kuni jamoa Yevropa Ligasida o‘z uyida Daniyaning "Midtyulland" klubiga imkoniyatni boy berib qo‘ydi (2:3). O‘yin davomida "Forest" muxlislari "seni ertalab ishdan bo‘shatishadi" deb hayqirishgan. Jurnalistlar mutaxassisdan bu borada fikr bildirishini so‘rashgan.

"Muxlislarning hafsalasi pir bo‘ldi, ular o‘z fikrini bildirishga haqli. Meni hech narsa ajablantirmaydi. Men buni nazorat qila olmayman. Mening vazifam - g‘alaba qozonish," - deya "Tottenxem"ning sobiq bosh murabbiyi so‘zlarini keltiradi jurnalist Fabrisio Romano.

Yakshanba kuni "Nottingem Forest" APL doirasida "Nyukasl"ga qarshi bahs olib boradi.