"Ноттингем Форест" мухлислари аллақачон бош мураббий Анге Постекоглунинг истеъфосини кутишмоқда.
Австралиялик мутахассис ушбу лавозимни 9 сентябрь куни Нуну Эшпириту Санту ўрнига эгаллаганди. "Ўрмончилар"нинг янги мураббий қўл остидаги натижалари ҳавас қилгулик эмас: тўрт мағлубият, икки дуранг ва бирорта ҳам ғалаба йўқ.
Пайшанба куни жамоа Европа Лигасида ўз уйида Даниянинг "Мидтюлланд" клубига имкониятни бой бериб қўйди (2:3). Ўйин давомида "Форест" мухлислари "сени эрталаб ишдан бўшатишади" деб ҳайқиришган. Журналистлар мутахассисдан бу борада фикр билдиришини сўрашган.
"Мухлисларнинг ҳафсаласи пир бўлди, улар ўз фикрини билдиришга ҳақли. Мени ҳеч нарса ажаблантирмайди. Мен буни назорат қила олмайман. Менинг вазифам - ғалаба қозониш," - дея "Тоттенхэм"нинг собиқ бош мураббийи сўзларини келтиради журналист Фабрицио Романо.
Якшанба куни "Ноттингем Форест" АПЛ доирасида "Ньюкасл"га қарши баҳс олиб боради.
