“Neftchi” - “Andijon” (2:0) o‘yinidan keyin mezbonlar ustozi Vitaliy Levchenko ham matbuot anjumanida fikrlari bilan o‘rtoqlashdi.
- O‘yinni qiyin bo‘ldi, deyishim mumkin. Bu derbi va qo‘shnilarni janggi bo‘ldi. Bu kabi uchrashuvlar doim kuchli bosim ostida o‘tadi. Bu ikki jamoa prinsipial raqiblar. G‘alaba qozonganimizdan juda xursandman. Muxlislarimizni xursand qildik va oldinga yurishda davom etamiz.
- “Nasaf” bilan ochkolar farqi yana qisqardi. “Nasaf”dan o‘tib ketish imkoniyatini necha foizga ayta olasiz?
- Biz tomondan nima qilishimiz kerak bo‘lsa barchasini qilyapmiz. Har bir o‘yinga tayyorgarlik ko‘ramiz va g‘alaba ishtiyoqida maydonga tushamiz. Chempionat og‘ir o‘tyapti va g‘alaba qozonish qiyin. Birinchi navbatda asosiy e’tiborni o‘z o‘yinimizga qaratishimiz va ochkolarimizni jamg‘arib borishimiz kerak. Turdan-turga o‘yinimizni mustahkamlab boraveramiz.
- Superligada qisqa tanaffus bo‘ladi. Bu vaqt ichida o‘rtoqlik o‘yini o‘tkaziladimi?
- Bu borada rejalashtirib turibmiz. Terma jamoaga chaqirilganlar bor va ular terma ixtiyoriga ketishadi. Biz bu davr ichida tuzgan rejamiz bo‘yicha ishlaymiz va bitta nazorat o‘yinida maydonga tushamiz.
- Milliy terma jamoani Fabio Kannavaro boshqarishi haqida ma’lumotlar chiqyapti. Bu haqida munosabatingiz qanday?
-. Bu borada biror fikr ayta olmayman. Chunki O‘FA mutasaddilari bor. Bunga javob beradigan mas’ul shaxslar bor. Oldinda bizni jahon chempionati kutib turibdi. Futbol mutasaddilari termani yanada kuchaytirish maqsadida taklif qilishayotgan bo‘lsa, bu yaxshi, albatta. Yangi murabbiy muxlislarni xursand qila olsa, biz ham bundan xursand bo‘lamiz.
- Zoran Marushich kam o‘ynayapti. Uni jarohati bormi?
- Jarohati bor edi. Yakka tartibda shug‘ullanishni boshladi. Biz uni keyingi uchrashuvlarda ko‘ramiz.
- Stadionda muhit zo‘r bo‘ldi. Muxlislar haqida fikrlaringiz...
- Bunday atmosferada o‘ynash juda yoqimli. Ikkala jamoa ishqibozlari ajoyib ravishda qo‘llab-quvvatlashdi. Mahalliy va andijonlik muxlislar muhitni zo‘r yaratib berishdi. Bu kabi bahslar OCHL doirasidagi o‘yinlarni eslatib yuboryapti. Ikkala jamoa ishqibozlariga respekt.
