Niko Shlotterbek Dortmundning "Borussiya" klubi bilan shartnomani uzaytirish bo‘yicha muzokaralar olib bormoqda, uning doirasida u yiliga 10 million yevro maosh olishi mumkin. "Bavariya" va "Real" vaziyatni kuzatib bormoqda.
Bild xabariga ko‘ra, "Borussiya" himoyachisi Niko Shlotterbek yangi shartnomada yiliga kafolatlangan 10 million yevro maosh ko‘rsatilishini talab qilmoqda. Futbolchi menisk jarohatidan tuzalganidan so‘ng, ehtimoliy yangi shartnoma haqidagi gap-so‘zlar darhol boshlandi. Futbolchining o‘zi getfootballnewsgermany.com xabariga ko‘ra, muzokaralarga quyidagicha izoh bergan:
- To‘g‘risini aytsam, yangi shartnoma masalasi bunchalik tez hal bo‘ladi, deb o‘ylamayman.
Hozirda klubning eng ko‘p maosh oluvchi futbolchisi Niklas Zyule bo‘lib, u yiliga 14 million yevro maosh oladi, ammo uning shartnomasi yakuniga yetmoqda, shuning uchun "Borussiya"da Shlotterbek bilan yangi shartnoma tuzish uchun mablag‘ bor deb hisoblanadi.
Uzoq davom etgan muzokaralar fonida futbolchiga kerakli shartlarni taklif bilan chiqishga tayyor turgan "Real" va "Bavariya" ham paydo bo‘ldi. Myunxenliklar hozirda Dayo Upamekano bilan shartnomani uzaytirish bo‘yicha muzokaralar olib bormoqda va ko‘p narsa uning natijalariga bog‘liq.
Shlotterbekning "Borussiya" bilan shartnomasi 2027 yilgacha mo‘ljallangan va agar ular kelisha olmasa, kelasi yozdayoq futbolchi transferga qo‘yiladi.
