UYEFA prezidenti Aleksander Cheferinning ta’kidlashicha, tashkilotda Chempionlar Ligasining yangi formati natijalaridan mamnun.

Uning so‘zlariga ko‘ra, endi Yevrokubokning asosiy bosqichi muxlislarga futbol berish kerak bo‘lgan asosiy tuyg‘uni – noaniqlik va kutilmagan natijalarni taqdim etmoqda.

«Tajribamdan kelib chiqib aytaman: futbolda hamma o‘zgarishni xohlaydi, lekin hech kim ularni amalga oshirishni istamaydi. Biz jasorat ko‘rsatdik va bunga qo‘l urdik, qiziqish bildirgan tomonlar bilan ko‘p suhbatlar o‘tkazdik», – dedi Cheferin.

«Avvalgi yillarda dekabrgacha qaysi jamoalar guruhdan chiqqanini bilardik. Ammo o‘tgan mavsumda “Manchester Siti” va PSJ taqdiri oxirgi turgacha noma’lum bo‘ldi.

Natijaning noaniqligi — bu futbolni tomosha qilishimizga sabab bo‘ladigan asosiy jihat. Agar natija avvaldan ma’lum bo‘lsa, futbol qiziq bo‘lmaydi. Shu jihatdan bu katta yutuq, biz juda mamnunmiz», – deb qo‘shimcha qildi UYEFA prezidenti.