Madridning “Real” klubi braziliyalik hujumchi Viniusis Juniorni yozgi transfer oynasida sotib yuborishi mumkin. Bu haqda Diario Sport nashriga tayanib Euro-Football xabar berdi.

Manbaga ko‘ra, klub rahbariyati futbolchini bu borada ogohlantirgan. Agar u yaqin kunlar ichida klub bilan yangi shartnomani imzolamasa, yozda boshqa jamoaga transfer qilinadi.

Vinisius hamda rahbariyat o‘rtasidagi kelishmovchiliklar uzoq vaqtdan beri OAV e’tiborida bo‘lib turibdi. Hujumchi jamoaning eng ko‘p maosh oladigan futbolchilaridan biriga aylanmoqchi. Biroq madridliklar futbolchining talablarini qanoatlantirmoqchi emas. Braziliyalik forvard hozirda yiliga 20 million yevro miqdorida maosh oladi.

Avvalroq Viniusis jamoani yanvar oyida ham tark etishi mumkinligi haqida xabarlar chiqqan edi. Jumladan unga Saudiya Arabistonining bir qancha klublari taklif tayyorlagan. Xaridorlar futbolchiga yiliga umumiy qiymati 1 milliard yevroga teng bo‘lgan 5 yillik shartnoma taklif qilgani aytilgandi.

Ma’lumot uchun, joriy mavsum 25 yoshli futbolchi barcha musobaqalar doirasida jami 10 ta o‘yinda maydonga tushib, o‘z hisobiga 5 ta gol hamda 4 ta golli uzatma yozdirib qo‘ygan. Uning “Real” bilan shartnomasi 2027 yil iyun oyiga qadar amal qiladi. Transfermarkt portali hujumchining qiymatini 150 million yevroga baholagan.