«Real» hujumchisi Kilian Mbappe «PSJ» tarkibida Lionel Messi bilan birga o‘ynagan davri haqidagi xotiralari bilan bo‘lishdi. Hozir Messi AQSHning «Inter Mayami» klubi sharafini himoya qilmoqda.

«Tarixga kirgan futbolchilar haqida gap ketganda, albatta, Messi yodga tushadi. U kiyinish xonasida oddiy inson edi. Mashhur bo‘lganingizda ko‘pchilik siz haqingizda turli gap-so‘zlar tarqatadi, ularga ishonsangiz, o‘zingiz ham shunga ishona boshlaysiz. Ammo u bunday emasdi — u haqiqatan ham oddiy inson bo‘lib, hammani hurmat qilardi. Futbolchi sifatida esa u beqiyos edi. Agar jamoangizda shunday inson bo‘lsa, u bilan birga bo‘lishingiz, uning qilgan har bir ishini kuzatishingiz kerak. U menga o‘yinni yaxshiroq tushunishga juda katta yordam berdi.

Menga Leo Messi bilan birga o‘ynash baxti nasib qildi. Faoliyatim davomida u bilan bir jamoada bo‘lishim mumkin deb hech o‘ylamaganman. Men uni butun umri davomida “Barselona”da qoladi deb o‘ylardim, chunki mening orzuyim “Real”da o‘ynash edi. “Barselona”ga o‘tish haqida hech qachon o‘ylamaganman. Men unga faqat minnatdorlik bildirishim mumkin. Bu men uchun ajoyib imkoniyat bo‘lgan», — dedi Mbappe "Movistar"ga bergan intervyusida.