"Bavariya" yarim himoyachisi Yozua Kimmix Xarri Keynning "Oltin to‘p"ni yutishi mumkinligi haqida gapirdi.

Ayni paytda angliyalik futbolchi nufuzli individual sovringa asosiy da’vogarlardan biri bo‘lib turibdi: forvard joriy mavsum boshidan buyon klub va terma jamoa safida 13 ta o‘yinda maydonga tushib, 21 ta gol va 3 ta golli uzatmani amalga oshirgan.

"Maqsadimiz jamoaviy muvaffaqiyatga erishish va shunda Keyn individual sovrinlarga da’vogarlik qilishi mumkin. Umuman olganda, maydonda bo‘lganimizda, u shaxsiy sovrinlar uchun o‘ynayotgandek taassurot uyg‘onmaydi. Xarri ko‘p qirrali o‘yinchi bo‘lib, jamoa manfaati uchun hamma narsani qiladi. Biz 3:0 hisobida g‘alaba qozonganimizda u gol ura olmaganidan xafa bo‘lganini hech qachon ko‘rmaganman," - deya Kimmixning so‘zlarini keltiradi Bayern & Germany.

Xarri Keyn "Oltin to‘p-2025" uchun nomzodlar o‘ttiztaligiga kirdi, ammo ovoz berish natijalariga ko‘ra atigi 13-o‘rinni egalladi.