Florian Virs so‘nggi vaqtlarda ko‘p tanqidga uchramoqda. "Liverpul" nemisning transferi uchun katta mablag‘ sarfladi, ammo futbolchi hozircha yaxshiroq o‘yin ko‘rsata olmayapti. Bu borada "Bayer" bosh murabbiyi Kasper Yulmann izoh berdi.

"Virsga tanqidlar? Qo‘ysangiz-chi, u yerga endigina kelgan-ku. U hammaga - ingliz ekspertlariga ham hammasini isbotlab beradi. Bunga ishonchim komil. Menga yangi klubda birinchi kundanoq eng yaxshi futbolini ko‘rsatadigan futbolchini ko‘rsating. Buning iloji yo‘q.

Virs ajoyib fazilatlarga ega fantastik futbolchi. Futbolda hamma narsa tez o‘zgaradi. Agar u keyingi o‘yinlarda bir-ikkita gol ursa, hamma: "Mana, nihoyat moslashdi," deydi. Va bu hozirgi tanqidlar kabi noto‘g‘ri bo‘ladi. Unga vaqt berish kerak - u o‘zini ko‘rsatishi aniq," - deya Yulmanning so‘zlarini keltiradi Bild.

"Liverpul" Premyer-liga turnir jadvalida "Arsenal"dan 1 ochko ortda qolib, 2-o‘rinda bormoqda.