Serbiya futbol ittifoqi Dragan Stoykovichning terma jamoa bosh murabbiyi lavozimini tark etganini rasman e’lon qildi.
Mutaxassis bir necha kun avval JCH–2026 saralashida Albaniyaga (0:1) qarshi mag‘lubiyatdan keyin iste’fo arizasini taqdim etgan. U 2021 yil mart oyidan buyon milliy jamoani boshqarib kelayotgandi. Stoykovich jamoani Qatardagi jahon chempionati va Yevro–2024 musobaqalariga olib chiqqan.
Avvalroq xabar qilinganidek, uning o‘rniga asosiy nomzod sifatida hozirda Moskva «Spartak»ini boshqarayotgan Deyan Stankovich ko‘rilmoqda.
— To‘rt yarim yildan keyin men endi Serbiya terma jamoasi bosh murabbiyi emasman. Avvalo, men Serbiya futbol ittifoqiga bildirilgan ishonchi uchun chin dildan minnatdorchilik bildiraman — mamlakatim milliy terma jamoasini boshqarish men uchun katta sharaf bo‘ldi. Biz birgalikda tarixiy natijaga erishdik va 24 yildan keyin ilk bor ketma-ket ikki yirik musobaqada — jahon chempionati va Yevropa chempionatida ishtirok etdik. Bu — men murabbiy sifatida oldimga qo‘ygan asosiy maqsadim edi, — dedi Stoykovich.













