O‘zbekiston Superligasining 25-turidan o‘rin olgan «Navbahor» – «Bunyodkor» jamoalari o‘rtasidagi uchrashuv arafasida «lochinlar»ning 37 yoshli tajribali himoyachisi Mirzohid G‘ofurov bo‘lajak bellashuv haqidagi fikrlari bilan o‘rtoqlashdi.

— Har ikki jamoa turnir jadvalida qo‘shni bo‘lganligi bois, bo‘lajak bahsning keskin hamda murosasiz kurashlar ostida, tomoshabop kechishi ehtimoli ancha yuqori. Ushbu o‘yinda yutuqqa erishsak, «qaldirg‘ochlar» bilan o‘rin almashib, bir pog‘ona yuqoriga ko‘tarilamiz. Shuning uchun g‘alaba qozonish niyatida maydonda tushib, buni amalga oshirishga barcha imkoniyatimizni ishga solamiz.

Yangi bosh murabbiy Sherzod Hamidovich Jo‘rayev boshchiligida jamoamizning o‘yini va natijalarida sekin-asta ijobiy o‘zgarishlar yuz bermoqda. Bo‘lajak o‘yinda ham raqibni mag‘lubiyatga uchratishga harakat qilamiz.

Ishqibozlardan esa jamoamizni yolg‘izlatib qo‘ymasliklari, stadionda munosib tarzda qo‘llab-quvvatlab turishlarini so‘rayman. Biz esa qo‘ldan kelganicha ularga quvonch ulashishga intilamiz, - dedi Mirzohid G‘ofurov.

«Navbahor» PFK matbuot xizmati.