Angliyaning “Manchester Yunayted” klubi Madridning “Real” jamoasida to‘p surayotgan braziliyalik hujumchi Endrikni o‘z safiga qo‘shib olishni istamoqda. Bu haqda Caught Offside nashri xabar bermoqda.

Manbaga ko‘ra, 19 yoshli futbolchi qishki transfer oynasida “Manchester Yunayted”ga ijara asosida o‘tishi mumkin. Ayni paytda Endrikka taxminan sakkizta klub jiddiy qiziqib turgani aytilmoqda. Biroq “Real” Madrid futbolchini sotishni rejalashtirmayapti. Klub rahbariyati uning rivojlanishini ta’minlash maqsadida boshqa jamoaga ijara asosida berish variantini jiddiy ko‘rib chiqmoqda. Shu bois, futbolchining kelajagiga yaqin kunlarda aniqlik kiritilishi kutilmoqda.

Ma’lumot uchun, joriy mavsumda Endrik “Real” safida hali birorta ham o‘yinda maydonga tushgani yo‘q. Bunga futbolchining jarohati sabab bo‘lgan. Uning klub bilan shartnomasi 2030 yil yozigacha amal qiladi. Transfermarkt portali hujumchining qiymatini 35 million yevroga baholanmoqda.

Avvalroq Endrikga Angliya Premyer-ligasining yana bir klubi — “Vest Hem”, shuningdek, Ispaniyaning “Valensiya” jamoalari ham qiziqish bildirayotgani haqida xabarlar tarqalgan edi.