Norvegiyaning Fyorde shahrida bo‘lib o‘tgan jahon chempionati Osiyo sportchilarining kuch, texnika va mahoratda dunyoda yetakchi mavqeni egallab kelayotganini yana bir bor yaqqol ko‘rsatdi.

Musobaqalar 10 kun davom etdi va unda besh qit’adagi 412 nafar sportchi ishtirok etdi. Eng ko‘p ishtirokchilar Yevropa va Osiyo qit’alaridan bo‘lib, ular jami qatnashchilarning 70 foizidan ortig‘ini tashkil etdi.

Chempionat yakunida jami 144 ta medal — 48 ta oltin, 48 ta kumush va 48 ta bronza medal o‘z egalariga topshirildi. Unda Osiyo sportchilari mutlaq ustunlik ko‘rsatib, 78 ta medal, jumladan 32 ta oltin medalni qo‘lga kiritishdi. Bu esa umumiy medallarning yarmidan ko‘pini tashkil etadi. Yevropa jamoalari 24 ta medal bilan chempionatni yakunladi, Panamerika mamlakatlari — 31 ta medal, Afrika — 9 ta, Okeaniya esa atigi 2 ta medal oldi.

Xususan, O‘zbekiston terma jamoasi musobaqani muvaffaqiyatli yakunlab, umumiy hisobda kuchli beshlikdan o‘rin oldi. Jumladan, Olimpiya chempioni va jahon rekordchisi Akbar Jo‘rayev —110 kg vazn toifasida mutlaq ustunlik bilan g‘alaba qozondi. U dast ko‘tarishda 196 kg, umumiy hisobda esa 428 kg bilan ikki jahon rekordini yangiladi va oltin medalni qo‘lga kiritdi.

Yana bir hamyurtimiz, 2016 yilgi Olimpiya chempioni Ruslan Nurudinov ham a’lo darajada chiqish qilib, yana shohsupaga ko‘tarildi. Bu esa o‘zbek og‘ir atletikasida tizimli tayyorgarlik va yuksak sport maktabi an’analari mavjudligini yana bir bor isbotladi.

Qayd etish kerak, Akbar Jo‘rayev va Ruslan Nurudinovning g‘alabalari — bu nafaqat shaxsiy yutuq, balki o‘zbek sportning qudratini, shuningdek, Markaziy Osiyoning jahon sport sahnasinidagi nufuzini yuksaltirgan muhim voqea bo‘ldi.