«Andijon» — “Al-Xolidiya (0:0) uchrashuvidan keyin tashkil etilgan matbuot anjumanida dastlab mehmonlar bosh murabbiyi Ali Ashur qatnashdi.

— O‘yindan oldingi rejamiz bo‘yicha yaxshi natija qayd etishimiz kerak edi. Bugun ikki ochko yo‘qotdik, deb ayta olaman. O‘yin durang bilan tugadi va ikkala klub bir ochkodan qo‘lga kiritdi. Menimcha, bu natija adolatli bo‘ldi. Boshidan o‘yinni yaxshi tashkil qilishga harakat qildik. To‘pni nazorat qildik. Maydon markazida ham nazoratni qo‘lga olishimiz kerak edi. Lekin doim ham biz o‘ylagan reja ish bermaydi. Maydon markazida biroz nazoratni yo‘qotdik. Birinchi bo‘limda «Andijon»ning 23-raqamli futbolchisi bizga katta xavf tug‘dirdi. Qanotlardan tezkorlik bilan jarima maydonchamizga yorib kirishga harakat qildi. Bu esa bizga katta muammolar tug‘dirdi. Tanaffusda futbolchilarimga qanotlarda extiyotkor bo‘lib o‘ynashlarini uqtirdim. Chunki o‘sha qanot xavf tug‘dirayotgandi. Shuning uchun ikkinchi taymdagi o‘zgarish orqali qanotni yopishga harakat qildik. Umuman olganda, bizda ham, raqibda ham imkoniyatlar bo‘ldi. 0:0 hisobidagi durangdan ikkala jamoa ochko oldi.

— Jamoangiz birinchi bo‘limni 30-daqiqasigacha tashabbusni qo‘lga oldi. Undan keyin ancha susayish paydo bo‘ldi. Bu nima bilan bog‘liq?

— Dastlabki daqiqalarda e’tiborimizni raqib jarima maydoniga qaratgandik. Futbolchilar gol urishni juda istashdi. Bu yarim himoyadagi kichkina xatolar. Ular qanotlardan xavfli hujumlar uyushtirishga tushganida bundan futbolchilarimiz biroz esankirab qolishdi. Xato qilmaslik, yarim himoyadan raqibni o‘tkazib yubormaslik haqida ko‘proq o‘ylab qolishdi. Birinchi bo‘limni oxirgi 15 daqiqasi aynan mana shunday holatda o‘tdi. Tanaffusdan keyin shu jihatni ko‘proq yopishga harakat qildik.

— O‘yindan oldingi matbuot anjumanida «Andijon»ni yaxshi o‘rganganingiz haqida aytib o‘tgandingiz. Uchrashuvda «Andijon» ancha tajovuzkor o‘yin ko‘rsatdi. Raqib siz kutgandek ko‘rindimi?

— O‘yindan oldin aytganimdek, yana qaytarishim mumkinki, jamoada yaxshi murabbiy va yaxshi futbolchilar bor. Ha, uchrashuvdan avval ularni shunday o‘yin ko‘rsatishlarini kutgandik. Bunday maydon, bunday muhit va muxlislar qarshisida yaxshi o‘yin ko‘rsatishga harakat qilishadi. Sababi, ishqibozlaridan pozitiv energiya olishadi. Bizga qiyin bo‘lishini bilgandik. 23-raqamli o‘yinchisi va jamoa sardori — 18-raqamli futbolchisi juda yaxshi o‘yin ko‘rsatishdi. Murabbiyni ularni almashtirib yuborgani menga biroz syurpriz bo‘ldi. Lekin ularni o‘rniga maydonga tushganlar ham yaxshi harakat qilishdi. O‘ynchilarim so‘nggi daqiqalarda raqibga imkoniyat bermaslik haqida o‘ylashdi.

— 5 noyabr kuni endi «Al-Xolidiya» «Andijon»ni qabul qiladi. Javob uchrashuvida qandaydir o‘zgarish bo‘lishi mumkinmi? Umuman, nima kutyapsiz?

— Ungacha 29 oktyabr kuni Qatarda «Al-Ahli»ga qarshi o‘yinimiz bor. Bor e’tiborimiz o‘sha uchrashuvga qaratiladi. 5 noyabr kungi bo‘ladigan o‘yinga kelsak, albatta, bu safargisidan farqli o‘yin bo‘ladi. Bor e’tiborimizni esa undan oldinga bahsga qaratib turamiz.

— «Andijon» muxlislari va “Bobur arena” stadioni sizga qanchalik yoqdi?

— Albatta, muxlislar menga juda yoqdi. Umuman, ishqibozlarni yoqtiraman. Maydon holati va stadion ajoyib. Andijondan juda katta taassurotlar bilan qaytyapman. Odamlari, shahar, mamlakat, taomlari, hammasi menga juda manzur bo‘ldi. Xudo xohlasa, jamoa Bahraynga borganda biz ham xuddi shunday kutib olishga harakat qilamiz.