Madridning «Real» klubi bosh murabbiyi Xabi Alonso Ispaniya chempionatining 10-turidan o‘rin olgan «el-klasiko» — «Barselona» (2:1) uchrashuvidan keyin o‘z fikrlarini bildirdi. Bellashuv 26 oktyabr kuni «Santyago Bernabeu»da bo‘lib o‘tgan.

Alonso so‘zlariga ko‘ra, uning shogirdlari bu uchrashuvga katta motivasiya bilan chiqqan:

«Jamoa katta ishtiyoq bilan o‘ynadi. O‘yin oldidan biz nafaqat uch ochko haqida, balki qay darajada o‘sganimizni va nimalarga erishmoqchi ekanimizni muhokama qildik. Bunday muhim bahsda g‘alaba qozongan yigitlardan juda mamnunman. Bu faqat natija emas — o‘ziga xos ahamiyatga ega g‘alaba. Lekin bu faqat boshlanish. Qilishimiz kerak bo‘lgan ishlarimiz hali ko‘p. Bugungi his-tuyg‘ularni keyingi o‘yinlarda ham saqlab qolishimiz kerak».

Mutaxassis jamoaning himoya va hujumdagi harakatlarini ham alohida ta’kidladi:

«Bugun ko‘p futbolchilar to‘psiz harakat qildi va biz raqibga yaxshi qarshilik ko‘rsata oldik. Himoyada ishonchli o‘ynadik, garchi gol yo‘qotilgan to‘p natijasida urilgan bo‘lsa-da. Oldinda ko‘p imkoniyatlar yaratdik. Energiya, ishonch va raqobatbardoshlik — g‘alabaning kaliti bo‘ldi. Stadiondan juda baxtiyor holda chiqyapmiz. Futbolchilar ham, muxlislar ham bu g‘alabadan zavq olishdi. Ular jamoaning qay darajada kurashayotganini ko‘rishdi. Bu loyiha endigina boshlandi, ammo muxlislar bilan aloqa — eng asosiy jihat, va buni bugun yana bir bor his qildim».

«Real» jamoasi 10 turdan so‘ng 27 ochko bilan La Liganing peshqadami bo‘lib turibdi. «Barselona» esa 22 ochko bilan ikkinchi o‘rinda qoldi. Shu tariqa, Xabi Alonso shogirdlari Ispaniya chempionatidagi asosiy raqibidan 5 ochko farq bilan ilgarilab ketdi.