Мадриднинг «Реал» клуби бош мураббийи Хаби Алонсо Испания чемпионатининг 10-туридан ўрин олган «эл-класико» — «Барселона» (2:1) учрашувидан кейин ўз фикрларини билдирди. Беллашув 26 октябрь куни «Сантьяго Бернабеу»да бўлиб ўтган.

Алонсо сўзларига кўра, унинг шогирдлари бу учрашувга катта мотивация билан чиққан:

«Жамоа катта иштиёқ билан ўйнади. Ўйин олдидан биз нафақат уч очко ҳақида, балки қай даражада ўсганимизни ва нималарга эришмоқчи эканимизни муҳокама қилдик. Бундай муҳим баҳсда ғалаба қозонган йигитлардан жуда мамнунман. Бу фақат натижа эмас — ўзига хос аҳамиятга эга ғалаба. Лекин бу фақат бошланиш. Қилишимиз керак бўлган ишларимиз ҳали кўп. Бугунги ҳис-туйғуларни кейинги ўйинларда ҳам сақлаб қолишимиз керак».

Мутахассис жамоанинг ҳимоя ва ҳужумдаги ҳаракатларини ҳам алоҳида таъкидлади:

«Бугун кўп футболчилар тўпсиз ҳаракат қилди ва биз рақибга яхши қаршилик кўрсата олдик. Ҳимояда ишончли ўйнадик, гарчи гол йўқотилган тўп натижасида урилган бўлса-да. Олдинда кўп имкониятлар яратдик. Энергия, ишонч ва рақобатбардошлик — ғалабанинг калити бўлди. Стадиондан жуда бахтиёр ҳолда чиқяпмиз. Футболчилар ҳам, мухлислар ҳам бу ғалабадан завқ олишди. Улар жамоанинг қай даражада курашаётганини кўришди. Бу лойиҳа эндигина бошланди, аммо мухлислар билан алоқа — энг асосий жиҳат, ва буни бугун яна бир бор ҳис қилдим».

«Реал» жамоаси 10 турдан сўнг 27 очко билан Ла Лиганинг пешқадами бўлиб турибди. «Барселона» эса 22 очко билан иккинчи ўринда қолди. Шу тариқа, Хаби Алонсо шогирдлари Испания чемпионатидаги асосий рақибидан 5 очко фарқ билан илгарилаб кетди.