Londonning "Tottenxem" klubi "Real"ning braziliyalik hujumchisi Endrikning holatini diqqat bilan kuzatib bormoqda. Bu haqda jurnalist Jeyms Devis ma’lum qildi.

Manbaga ko‘ra, Endrik "Real"dagi o‘yin amaliyotidan norozi va yanvar oyida ijaraga ketishga tayyor. Shu bilan birga, hujumchi o‘z kelajagini aynan "qaymoqranglilar" bilan bog‘lamoqda. Ta’kidlanishicha, "shporlar" Endrikni qishki transfer oynasida taklif qilishi mumkin, chunki uning o‘yin sifatlari klubga to‘liq mos keladi.

Joriy mavsumda 19 yoshli hujumchi biror marta maydonga tushmadi. Uning "Real" bilan amaldagi shartnomasi 2030 yilga qadar imzolangan.