Bugun Bahrayn Qirolligida bo‘lib o‘tayotgan 3-Osiyo yoshlar o‘yinlari dasturidan o‘rin olgan futzal musobaqasida yarim final uchrashuvlari bo‘lib o‘tadi. Medallar uchun kurash olib borayotgan kuchli to‘rtta jamoa safida O‘zbekiston o‘smirlar terma jamoasi ham bor.

Guruh bosqichida muvaffaqiyatli ishtirok etgan o‘smirlarimiz yarim finalda Eron o‘smirlar terma jamoasiga qarshi maydonga tushadi.

Yevropada xizmat safarida bo‘lib turgan O‘zbekiston futzal federasiyasi prezidenti Bekzod Mamatqulov biroz oldin o‘smirlar terma jamoamiz murabbiylar shtabi hamda futbolchilari bilan onlayn muloqot o‘tkazdi. Suhbat davomida federasiya rahbari o‘smirlar jamoasi a’zolariga ishonch bildirib, mas’uliyatli uchrashuv oldidan ularga kuch-quvvat va omad tiladi.

— Bu sizning Vatan sharafini himoya etayotgan ilk yirik musobaqangiz. Ortingizda ko‘p ming sonli futbol ishqibozlari, ota-onalaringiz va yaqinlaringiz duoda bo‘lib turishibdi. Biz sizning mahoratingiz, qobiliyatingiz va salohiyatingizga ishonamiz. Eng muhimi, raqibdan cho‘chimay, o‘z o‘yinlaringizni namoyish eting. Maydonda bor kuch, mahorat va irodangizni ko‘rsating, — dedi Bekzod Mamatqulov.

Eslatib o‘tamiz, Eron – O‘zbekiston o‘smirlar terma jamoalari uchrashuvi Toshkent vaqti bilan soat 18:00 da start oladi.

Yosh futzalchilarimizga yarim finalda omad tilaymiz!