Бугун Баҳрайн Қироллигида бўлиб ўтаётган 3-Осиё ёшлар ўйинлари дастуридан ўрин олган футзал мусобақасида ярим финал учрашувлари бўлиб ўтади. Медаллар учун кураш олиб бораётган кучли тўртта жамоа сафида Ўзбекистон ўсмирлар терма жамоаси ҳам бор.

Гуруҳ босқичида муваффақиятли иштирок этган ўсмирларимиз ярим финалда Эрон ўсмирлар терма жамоасига қарши майдонга тушади.

Европада хизмат сафарида бўлиб турган Ўзбекистон футзал федерацияси президенти Бекзод Маматқулов бироз олдин ўсмирлар терма жамоамиз мураббийлар штаби ҳамда футболчилари билан онлайн мулоқот ўтказди. Суҳбат давомида федерация раҳбари ўсмирлар жамоаси аъзоларига ишонч билдириб, масъулиятли учрашув олдидан уларга куч-қувват ва омад тилади.

— Бу сизнинг Ватан шарафини ҳимоя этаётган илк йирик мусобақангиз. Ортингизда кўп минг сонли футбол ишқибозлари, ота-оналарингиз ва яқинларингиз дуода бўлиб туришибди. Биз сизнинг маҳоратингиз, қобилиятингиз ва салоҳиятингизга ишонамиз. Энг муҳими, рақибдан чўчимай, ўз ўйинларингизни намойиш этинг. Майдонда бор куч, маҳорат ва иродангизни кўрсатинг, — деди Бекзод Маматқулов.

Эслатиб ўтамиз, Эрон – Ўзбекистон ўсмирлар терма жамоалари учрашуви Тошкент вақти билан соат 18:00 да старт олади.

Ёш футзалчиларимизга ярим финалда омад тилаймиз!