«Inter» darvozaboni Xosep Martines nogiron aravasidagi keksani urib yuborib, uning o‘limiga sabab bo‘lgan hodisadan keyin bir hafta dam oladi va psixolog bilan ishlaydi, deb xabar berdi La Gazzetta dello Sport.
Fojea seshanba kuni ertalab «Inter»ning mashg‘ulot bazasi yaqinida sodir bo‘lgan. 81 yoshli erkak nogiron aravasida yo‘lga chiqib qolgan va Martines boshqaruvidagi avtomobil uni urib yuborgan. Futbolchi jarohat olgan kishini qutqarish uchun qo‘lidan kelganicha harakat qilgan, ammo u shifoxonada vafot etgan. Xabarlarga ko‘ra, hodisadan so‘ng Martines qattiq shok holatiga tushgan. Huquq-tartibot idoralari halokatning barcha tafsilotlarini o‘rganmoqda.
Martines 2024 yilda «Jenoa»dan «Inter»ga o‘tgan. 27 yoshli darvozabon neradzurrilar safida 12 ta o‘yin o‘tkazgan.













