Sport vaziri o‘rinbosari Shaxrillo Mahmudov Bahrayn Sport ishlari bo‘yicha bosh boshqarmasining bosh direktori doktor Abdurahmon Asqar bilan uchrashuv o‘tkazdi.
Mazkur uchrashuv Bahrayn tomonining tashabbusi bilan tashkil etilib, suhbat davomida Shaxrillo Maxmudov mamlakatimizda sportchilarni tayyorlash tizimi, seleksiya jarayonlari hamda yosh iste’dodlarni qo‘llab-quvvatlash borasidagi ilg‘or tajribalar haqida atroflicha ma’lumot taqdim etdi.
O‘z navbatida, Bahrayn tomoni O‘zbekiston sportchilarining so‘nggi yillarda qo‘lga kiritayotgan yutuqlarini yuqori baholab, ularning xalqaro maydondagi muvaffaqiyatlarini kuzatib borayotganliklarini va bu natijalar katta qiziqish uyg‘otayotganini ta’kidladi.
Uchrashuv chog‘ida sport sohasidagi hamkorlikni yanada kengaytirish, yangi tashabbuslarni amalga oshirish hamda xalqaro miqyosdagi qo‘shma loyihalarni rivojlantirish masalalarini muhokama qilindi.
Xususan, O‘zbekiston va Bahrayn sportchilari o‘rtasida o‘zaro tajriba almashish, qo‘shma yig‘in mashg‘ulotlarini tashkil etish va bu yo‘nalishda hamkorlik shartnomasini imzolash rejalashtirilmoqda.
