O‘zbekiston delegasiyasi Bahraynda yakuniga yetgan III Osiyo yoshlar o‘yinlaridagi ishtirokini tugatdi.

Qit’amizning 45 mamlakatidan 4000 nafardan ortiq yosh sportchisi ishtirok etgan mazkur musobaqada yosh atletlarimiz yuksak mahorat va jasorat ko‘rsatib, murosasiz bellashuvlarda 37 ta oltin, 16 ta kumush va 28 ta bronza, jami 81 ta medal bilan umumjamoa hisobida Xitoydan keyin faxrli ikkinchi o‘rinni egallashdi.

Ushbu natijaning tarixiyligi shundaki, delegasiyamiz I Osiyo yoshlar o‘yinlarida 3 ta bronza, II O‘yinlarda esa 1 ta oltin, 2 ta kumush va 3 ta bronza medallarini qo‘lga kiritgan bo‘lsa, bu gal mazkur raqamlar ancha salmoqli ko‘rinish oldi.

Shubhasiz, bunday natija ortida muhtaram Prezidentimiz tomonidan nafaqat professional, balki yoshlar sportiga ham qaratilayotgan ulkan e’tibor va g‘amxo‘rlik turibdi, desak mubolag‘a bo‘lmaydi.

O‘zbekiston Milliy Olimpiya qo‘mitasi III Osiyo yoshlar o‘yinlarida qayd etilgan ushbu yuksak natija bilan barcha federasiya va assosiasiyalar, sportchi hamda murabbiylar, millionlab yurtdoshlarimizni samimiy tabriklaydi.