Mo‘g‘ulistonning Ulan-Bator shahrida 7 yoshdan 17 yoshgacha bo‘lgan maktab o‘quvchilari o‘rtasida shaxmatning standart yo‘nalishi bo‘yicha poyoniga yetgan Osiyo chempionatida O‘zbekiston terma jamoasi a’zolarining 4 nafari sovrindorlar qatoridan joy egalladi.

16 ta davlatning 675 nafar shaxmatchi yoshlari qatnashgan qit’a birinchiligida 9 yoshgacha bo‘lgan qiz bolalar o‘rtasida Madinabonu Asadova 9 imkoniyatdan 7,5 ochko jamg‘arib, 1-o‘rinni, Farzonabonu Bozorova 7,5 ochko bilan qo‘shimcha ko‘rsatkichlar evaziga 2-o‘rinni egalladi.

13 yoshgacha bo‘lgan qiz bolalar musobaqasida Mohinur Hikmatxonova 9 imkoniyatdan 7 ochko to‘plab, kumush medalni, 15 yoshgacha bo‘lgan o‘g‘il bolalar bahsida Tohir Ne’matov 7 ochko bilan kumush medalga egalik qildi.

Chempionatning so‘nggi kunlarida blis yo‘nalishidagi musobaqalar tashkil etiladi.