O‘zbekiston chempionatining 27-turi doirasida “Mash’al” o‘z maydonida "Qo‘qon-1912"ni qabul qilib, kichik hisobda g‘alaba qozondi.

Jamoalar bahs boshida ehtiyotkor o‘yin namoyish etishdi. 13-daqiqada “Mash’al” hisobni ochdi — Humoyun Murtazoyev bosh bilan raqib darvozasini ishg‘ol qildi.

Goldan keyin mezbonlar ustunlikni saqlab qolishga harakat qilishdi. Bunga qaramay, qo‘qonliklar ham javob hujumlarini yo‘lga qo‘yishdi. 19-daqiqada Andro Giorgadze uzoq masofadan kuchli zarba yo‘lladi, ammo darvozabon aniq harakat qildi. 24-daqiqada Hasanovning zarbasini ham darvozabon qiyinchilik bilan qaytardi.

Birinchi bo‘lim davomida “Qo‘qon-1912” ko‘plab hujumlar uyushtirdi, ammo raqibning himoyasi qattiq va jips harakat qildi. Tanaffusga mezbonlar minimal ustunlik bilan yo‘l olishdi — 1:0.

49-daqiqada Haydarov raqib jarima maydonida yiqildi va hakam penalti belgiladi. Biroq VAR orqali holatni ko‘rib chiqqan hakam qarorni bekor qildi. Bu epizod bahsning burilish nuqtasi bo‘lishi mumkin edi.

O‘yin oxirigacha jamoalar imkon qadar hujum tashkil qilishga urinishdi, ammo hisob uchrashuv oxirigacha o‘zgarmadi.

Ushbu g‘alabadan keyin "Mash’al” o‘z ochkolarini 26 taga yetkazib, jadvalda 13-o‘ringa ko‘tarilib oldi. “Qo‘qon-1912” esa 29 ochko bilan 11-pog‘onani egallab turibdi.

Superliga, 27-tur
"Mash’al” — “Qo‘qon-1912” — 1:0
Gol: Humoyun Murtazoyev (13)