Saudiya Arabistoni poytaxti Ar-Riyod shahrida o‘tkazilayotgan Islom Birdamligi o‘yinlarining futzal turida kecha 2-tur uchrashuvlari bo‘lib o‘tdi. Nodir Eliboyev boshchiligidagi O‘zbekiston milliy terma jamoasi ikkinchi uchrashuvda ham g‘alaba qozonib, muddatidan oldin medallar uchun kurash olib boruvchi to‘rtlikda o‘rin egalladi. Yarim finalga terma jamoamiz guruhda birinchi o‘rinni egallab chiqishi masalasi ham deyarli hal bo‘ldi.

Ozarbayjon terma jamoasiga qarshi kechgan bahs hamyurtlarimizning to‘liq ustunligi ostida o‘tdi. Uchrashuvning ikkinchi daqiqasidayoq hakam VAR yordamida vaziyatni tekshirib, ozarbayjonliklar darvozasiga penalti belgiladi. Garcha bu imkoinyatdan Muzaffar Axadjonov foydalana olmagan bo‘lsada, bu raqibni yirik mag‘lubiyatdan qutqarib qololmadi. Muzaffar Axadjonov hamda Muhammadali Xusanboyevlar bu bahsda xet-trikka erishishdi. Akbar Usmonov esa dubl qayd etdi. Shuningdek, Ixtiyor Ropiyev, Ilxomjon Hamroyev, Eldor Nigmatov, Abror Axmedzyanov, Xayrulla Solixovlar ham o‘z ismi shariflarini tabloga bir martadan yozdirib qo‘yishdi.

O‘zbekiston terma jamoasi 3-turni 8 noyabr kuni Liviya terma jamoasiga qarshi o‘tkazadi. Uchrashuv Toshkent vaqti bilan soat 18:00 da boshlanadi.

Islom Birdamligi o‘yinlarining 2-turida qayd etilgan barcha natijalar bilan tanishing:

«A» guruhi
O‘zbekiston – Ozarbayjon – 13:2
Saudiya Arabistoni – Liviya – 5:1

«B» guruhi
Marokash – Tojikiston – 7:1
Eron – Afg‘oniston – 2:2