Superliganing 28-turidan o‘rin olgan OKMK va "Navbahor" o‘rtasida kechgan Olmaliqdagi o‘yin shiddat bilan boshlandi. Ilk daqiqalardanoq ikki jamoa faol harakat qildi, bir necha xavfli hujumlar amalga oshirildi. OKMK darvozaboni Hamidullo Abdunabiyevning ishonchli o‘yini ilk daqiqalarda jamoasini goldan saqlab qoldi.

27-daqiqada hisob ochildi. Arihiro Sentoku va Xurshid G‘iyosovning yaxshi o‘zaro kombinasiyasi orqali yaratilgan imkoniyatdan Ali Abdurahmonov aniq foydalandi — 1:0.

Bir daqiqadan so‘ng «konchilar» yana gol urishdi. Bu safar Sentoku Ruben Sanchesga aniq uzatma berdi, ispaniyalik legioner esa raqib darvozasini ishg‘ol qildi — 2:0.

39-daqiqada Xurshid G‘iyosov yana bir assistni amalga oshirdi, Nodirbek Abdurazzoqov esa hisobni yirik ko‘rinishga olib chiqdi — 3:0.

Birinchi bo‘limda «Navbahor» ham bir necha bor gol urish imkoniga ega bo‘ldi, ammo Abdunabiyevning ajoyib seyvlari OKMK darvozasini goldan saqlab qoldi.

Ikkinchi taymda OKMK o‘yinni nazorat qilib bordi. 59-daqiqada Islom To‘xtaxo‘jayev bosh bilan xavfli zarba berdi, ammo mehmonlar darvozaboni to‘pni qaytardi.

81-daqiqada «Navbahor» javob golini urdi — Zabihillo O‘rinboyev hisobni qisqartirdi (3:1).

Shunga qaramay, o‘yin oxirida ham Abdunabiyev bir necha bor jamoasini qutqardi va «konchilar» muhim g‘alabani saqlab qoldi.

OKMK bu turda ishonchli g‘alaba evaziga o‘z ochkolarini 44 taga yetkazib, egallab turgan 6-pog‘onani mustahkamladi. "Navbahor" esa 38 ochko bilan 7-o‘rinda qoldi.

Superliga. 28-tur
OKMK — «Navbahor» 3:1
Gollar: Ali Abdurahmonov (27), Ruben Sanches (28), Nodirbek Abdurazzoqov (39) — Zabihillo O‘rinboyev (81)