Суперлиганинг 28-туридан ўрин олган ОКМК ва "Навбаҳор" ўртасида кечган Олмалиқдаги ўйин шиддат билан бошланди. Илк дақиқаларданоқ икки жамоа фаол ҳаракат қилди, бир неча хавфли ҳужумлар амалга оширилди. ОКМК дарвозабони Ҳамидулло Абдунабиевнинг ишончли ўйини илк дақиқаларда жамоасини голдан сақлаб қолди.

27-дақиқада ҳисоб очилди. Ариҳиро Сентоку ва Хуршид Ғиёсовнинг яхши ўзаро комбинацияси орқали яратилган имкониятдан Али Абдураҳмонов аниқ фойдаланди — 1:0.

Бир дақиқадан сўнг «кончилар» яна гол уришди. Бу сафар Сентоку Рубен Санчесга аниқ узатма берди, испаниялик легионер эса рақиб дарвозасини ишғол қилди — 2:0.

39-дақиқада Хуршид Ғиёсов яна бир ассистни амалга оширди, Нодирбек Абдураззоқов эса ҳисобни йирик кўринишга олиб чиқди — 3:0.

Биринчи бўлимда «Навбаҳор» ҳам бир неча бор гол уриш имконига эга бўлди, аммо Абдунабиевнинг ажойиб сейвлари ОКМК дарвозасини голдан сақлаб қолди.

Иккинчи таймда OKMK ўйинни назорат қилиб борди. 59-дақиқада Ислом Тўхтахўжаев бош билан хавфли зарба берди, аммо меҳмонлар дарвозабони тўпни қайтарди.

81-дақиқада «Навбаҳор» жавоб голини урди — Забиҳилло Ўринбоев ҳисобни қисқартирди (3:1).

Шунга қарамай, ўйин охирида ҳам Абдунабиев бир неча бор жамоасини қутқарди ва «кончилар» муҳим ғалабани сақлаб қолди.

OKMK бу турда ишончли ғалаба эвазига ўз очколарини 44 тага етказиб, эгаллаб турган 6-поғонани мустаҳкамлади. "Навбаҳор" эса 38 очко билан 7-ўринда қолди.

Суперлига. 28-тур
OKMK — «Навбаҳор» 3:1
Голлар: Али Абдураҳмонов (27), Рубен Санчес (28), Нодирбек Абдураззоқов (39) — Забиҳилло Ўринбоев (81)