Bugun O‘zbekiston velosiped sporti federasiyasi raisining birinchi o‘rinbosari Kozim O‘rinboyxo‘jayev hamda shosse dasturida O‘zbekiston terma jamoasi murabbiyi Vladimir Starchik (Ukraina) MOQda mehmon bo‘lishdi.
Ular Qo‘mita rahbariyatiga terma jamoaning Los-Anjeles-2028 yozgi Olimpiya o‘yinlariga olib borayotgan tayyorgarligi xususida ma’lumot berishdi.
Mas’ullar suhbatda terma jamoa oldiga katta maqsadlar qo‘yilgani, barcha yo‘nalishlarda asosiy kontingent saralab olingani, sportchilarning yil davomida ishtirok etishi ko‘zda tutilgan xalqaro musobaqalar haqida batafsil to‘xtalib o‘tishdi.
Qo‘mita rasmiylari federasiya tomonidan bildirilgan tashabbuslarni qo‘llab-quvvatlab, uni yanada boyitish, xususan, seleksiya yo‘nalishlariga ham ahamiyat berish lozimligini ta’kidlashdi. O‘z navbatida, Sport vazirligi va MOQ federasiyalarga har tomonlama ko‘mak berishi qo‘shimcha qilindi.
