Hindistonning Goa shahrida bo‘lib o‘tayotgan shaxmat bo‘yicha jahon kubogi musobaqasida kecha 4-bosqichga start berildi.
Javohir Sindarov va Nodirbek Yoqubboyev birinchi bahsda qora donalarda harakat qilishdi.
Nodirbek Yakubboyev (2689) va hindistonlik Pranav Vantekash (2641) o‘rtasidagi o‘yinda shaxmatchilar deyarli bexato harakat qilishdi. O‘yin o‘rtalarida kompyuter kichik ustunlikni hamyurtimizga berdi. Ammo buni g‘alabaga aylantirishning deyarli imkoni yo‘q edi. Boz ustiga, raqib ham bexato himoyalandi. 80 ta yurishdan keyin tomonlar durangga imzo chekdi.
Javohir Sindarov (2721) va xitoylik Yu Yanyi (2720) o‘rtasidagi o‘yinda shaxmatchilar juda katta aniqlikda harakat qilishdi (98,8 va 98,6%). Bahs Katalon himoyai bilan boshlandi va tez orada bir qator almashinuvlar ro‘y berishi oqibatida sportchilar Endshpilga o‘tib ketishdi. Xitoylik raqib endshpilda bitta ortiqcha piyodaga ega bo‘lsa-da, 73-yurishdan keyin bahsda durang qayd etildi.
Javohir Sindarov - Yu Yangyi (Xitoy) - 0,5 : 0,5
Nodirbek Yoqubboyev - Pranav Vantekash (Hindiston) - 0,5 : 0,5.
Hamyurtlarimiz bugun oq donalarda o‘ynashadi.













