O‘zbekiston milliy terma jamoasi “Al Ain International Cup” xalqaro o‘rtoqlik musobaqasining yarim finalida Misr terma jamoasiga qarshi maydonga tushib, ishonchli tarzda g‘alaba qozondi.

“Hazza bin Zayed” stadionida o‘tgan uchrashuv 2:0 hisobida Fabio Kannavaro shogirdlari foydasiga yakunlandi. Uchrashuv qahramoni esa, shubhasiz, dubl muallifi — Oston O‘runov bo‘ldi.

Birinchi taym: O‘runovning erta goli va ustunlik
O‘yin yuqori tempda boshlandi. Dastlabki daqiqalardanoq O‘zbekiston tashabbusni qo‘lga olib, raqib yarim maydonda faol xarakat qildi. Bu bosim 4-daqiqada o‘z samarasini berdi — Oston O‘runov raqib jarima maydoni atrofida misrlik 4-5 nafar o‘yinchini aldab o‘tib ketdi va darvozabon bilan yakkama-yakka vaziyatda to‘pni ustun orqali to‘rga joyladi.

Goldan keyin ham jamoamiz o‘yin tizginini qo‘ldan chiqarmadi. Qanotlardan tezkor reydlar, markaz orqali oqilona paslar Misr himoyasini bir necha bor qiyin ahvolga soldi. Xususan, Eldor Shomurodov darvozabon bilan yakkama-yakka vaziyatdan unumli foydalana olmadi.

Taym yakuniga yetib borayotganda esa O‘runov yana bir bor o‘z mahoratni namoyon qildi. 44-daqiqada u Shomurodov uzatmasidan keyin Misr posboni bilan birga-bir vaziyatda uni aldab o‘tib, hisobni 2:0 ko‘rinishiga keltirdi. Birinchi bo‘lim ana shunday ustunlik bilan yakunlandi.

Ikkinchi taym: nazorat, almashinuvlar va hisobni saqlab qolish

Ikkinchi bo‘lim Misrning ustunligi ostida o‘tdi. 53-daqiqada Oston O‘runov va Aziz G‘aniyev o‘rniga Aksmal Mozgovoy hamda Xojimat Erkinov maydonga tushirildi — bu o‘zgarish o‘yin sur’atini pasaytirmay, aksincha, markazdagi nazoratni mustahkamladi.

69-daqiqada yana bir almashinuv amalga oshirilib, Otabek Shukurov o‘rniga Doston Hamdamov o‘yinga qo‘shildi. Jamoa butun taym davomida hisobni saqlab qolish bilan birga, imkoniyat paydo bo‘lgan vaziyatlarda hujumlarni ham unutmadi.

Misr termasi bir necha bor gol kiritishga urindi, ammo himoyachilarimiz va darvozabon hushyorlik bilan harakat qilib, xavfli zarbalarning oldini olishdi.

90-daqiqada Farrux Sayfiyev va Rustam Ashurmatov o‘yinga qo‘shildi va jamoa o‘yinni muvaffaqiyatli tarzda yakunladi. Qo‘shimcha vaqtlarda ham hisob o‘zgarmadi: 2:0 — O‘zbekiston finalda!

Uchrashuv qahramoni — Oston O‘runov
Uchrashuvning eng faol va samarali o‘yinchisi Oston O‘runov bo‘ldi. Uning ikki goli jamoamizni finalga olib chiqdi. O‘runov nafaqat gollari, balki yarimmaydondagi harakatlari, tezkor qarorlari va hujumning markaziy figurasi sifatida ajralib turdi.

Final kutmoqda

Ushbu g‘alabadan so‘ng O‘zbekiston milliy terma jamoasi “Al Ain International Cup” xalqaro o‘rtoqlik musobaqa finaliga yo‘l oldi. Finalda bizni Eron kutib turibdi.

“Al Ain International Cup” xalqaro turniri.
Yarim final
MISR - O‘ZBEKISTON - 0:2
Gollar: Oston O‘runov (4, 43)

Final. 18 noyabr, 21:00
“Hazza bin Zayed” stadioni
O‘zbekiston — Eron