Xorvatiya terma jamoasi bosh murabbiyi Zlatko Dalich Chernogoriya bilan jahon chempionati saralashining so‘nggi o‘yini oldidan o‘z fikrlarini bildirib o‘tdi.
O‘yin 17 noyabr kuni bo‘lib o‘tadi va Toshkent vaqti bilan 00:45 da boshlanadi.
Xorvatlar Farer orollari ustidan qozonilgan g‘alabadan so‘ng JCH yo‘llanmasini naqd qilgan edi.
"Biz jahon chempionatiga yo‘llanmani qo‘lga kiritdik va buni nishonladik. Oldinda bizni qiyin o‘yin va motivasiyali raqib kutmoqda. Hozircha eng yaxshi kvalifikasiyani o‘tkazishni istaymiz. Biz g‘alaba qozonishni istaymiz, maksimal motivasiya bilan boramiz," - deya Dalichning so‘zlarini keltiradi Xorvatiya futbol ittifoqi rasmiy sayti.
"Boshqa futbolchilarga imkoniyat beramiz, ammo Luka Modrich o‘ynashiga va’da berishim mumkin. Chernogoriya jamoatchiligi Modrichni ko‘rishga loyiq. Luka albatta o‘ynaydi," - dedi Dalich.
Xorvatiya 19 ochko, Chexiya 13 ochko, Farer 12 ochko, Chernogoriya 9 ochko, Gibraltar 0 ochko jamg‘argan.
