Hindistonning Goa shahrida bo‘lib o‘tayotgan shaxmat bo‘yicha jahon kubogi musobaqasida bugun chorak final bosqichi doirasida javob uchrashuvlari bo‘lib o‘tdi.
Javohir Sindarov bugun meksikalik Xose Martinesga qarshi qora donalarda o‘ynadi. Tomonlar juda tez durangga imzo chekishdi. Bahs boshlanganiga yarim soat bo‘lmasdan shaxmatchilar 25-yurishga kelib yurishlarni 3 martadan takrorlashdi. Shu tariqa, Sindarov-Martines to‘qnashuvida g‘olib nomi ertaga o‘tkaziladigan tay-brekda aniqlanadi.
Chorak finalchilar orasida birinchi bo‘lib Nodirbek Yoqubboyev yarim final yo‘llanmasini qo‘lga kiritdi. Hamyurtimiz kecha germaniyalik Aleksandr Donchenkoni oq donalarda mag‘lub etgach, bugun durang uchun o‘ynadi. Donchenko g‘alaba uchun yo‘l qidirdi. Ammo 57-yurishga kelib unda g‘alaba uchun imkoniyat qolmaganini tushunib yetdi va durangga rozi bo‘ldi.
Nodirbek Yoqubboyev jahon kubogi yarim finaliga chiqdi. U final ostonasida Sindarov-Martines to‘qnashuvi g‘olibiga qarshi bahs olib boradi. Agar Javohir yarim finaliga chiqsa, o‘zbek derbisiga guvoh bo‘lamiz. Natijada kamida bir nafar o‘zbekistonlik shaxmatchi Jahon chempionlik toji uchun talabgorlar musobaqasi yo‘llanmasini qo‘lga kiritadi.
