Ҳиндистоннинг Гоа шаҳрида бўлиб ўтаётган шахмат бўйича жаҳон кубоги мусобақасида бугун чорак финал босқичи доирасида жавоб учрашувлари бўлиб ўтди.
Жавоҳир Синдаров бугун мексикалик Хосе Мартинесга қарши қора доналарда ўйнади. Томонлар жуда тез дурангга имзо чекишди. Баҳс бошланганига ярим соат бўлмасдан шахматчилар 25-юришга келиб юришларни 3 мартадан такрорлашди. Шу тариқа, Синдаров-Мартинес тўқнашувида ғолиб номи эртага ўтказиладиган тай-брекда аниқланади.
Чорак финалчилар орасида биринчи бўлиб Нодирбек Ёқуббоев ярим финал йўлланмасини қўлга киритди. Ҳамюртимиз кеча германиялик Александр Донченкони оқ доналарда мағлуб этгач, бугун дуранг учун ўйнади. Донченко ғалаба учун йўл қидирди. Аммо 57-юришга келиб унда ғалаба учун имконият қолмаганини тушуниб етди ва дурангга рози бўлди.
Нодирбек Ёқуббоев жаҳон кубоги ярим финалига чиқди. У финал остонасида Синдаров-Мартинес тўқнашуви ғолибига қарши баҳс олиб боради. Агар Жавоҳир ярим финалига чиқса, ўзбек дербисига гувоҳ бўламиз. Натижада камида бир нафар ўзбекистонлик шахматчи Жаҳон чемпионлик тожи учун талабгорлар мусобақаси йўлланмасини қўлга киритади.
