"PSJ" klubi va Marokash terma jamoasi himoyachisi Ashraf Hakimiy Afrikada 2025 yilning eng yaxshi futbolchisi sovrinini qo‘lga kiritgani haqida fikr bildirdi.
"Uzoq yillik mashaqqatli mehnat, muvaffaqiyat va unutilmas lahzalarni o‘zida mujassam etgan e’tirof. Oilamga, jamoadoshlarimga va men bilan har kuni, maydonda va undan tashqarida ishlaydigan barchaga minnatdorchilik bildiraman. Sizning ishonchingiz, sadoqatingiz va qo‘llab-quvvatlashingiz meni yanada kuchli qiladi va o‘sishimga imkon beradi.
Doimo qo‘llab-quvvatlaganlari uchun butun Marokash xalqiga rahmat. Umid qilamanki, bu lahza mamlakatimiz va qit’amizdagi har bir bolani o‘z orzulariga ishonishga va ular uchun kurashishga ilhomlantiradi", - deb yozdi Hakimiy ijtimoiy tarmoqda.
O‘tgan mavsumda "PSJ" bilan Chempionlar Ligasi, Fransiya Kubogi, Liga 1 va Fransiya Superkubogida g‘alaba qozongan 27 yoshli marokashlik futbolchi ovoz berishda "Liverpul" hujumchisi Muhammad Saloh va "Galatasaroy" forvardi Viktor Osimxendan o‘zib ketdi.
