Kataloniyaning “Barselona” klubi hujumchisi Robert Levandovski joriy mavsum yakunida jamoadan ketishi mumkin. Futbolchining klub bilan shartnomasi 2026-yilning yozida yakuniga yetadi. Shu bois uni 5 ta klub o‘z safiga qo‘shib olishni istamoqda. Bu haqda Fichajes nashri xabar berdi.

Unga ko‘ra, Turkiyaning “Fenerbahche”, Italiyaning “Milan”, Saudiya Arabistonining “An-Nassr”, Ispaniyaning “Atletiko” hamda Angliyaning “Manchester Yunayted” klublari polshalik forvardni erkin agent sifatida jamoaga taklif qilishni rejalashtirmoqda.

Futbolchining “Barselona”dan ketish ehtimoli yuqori. Chunki kataloniyaliklar Robertning yoshi, past samaradorligi va raqibga bosim o‘tkaza olish qobiliyatining susaygani ortidan hujumchi bilan yangi shartnoma imzolashni istamayapti. 37 yoshli forvard esa “Barselona”da qolishni xohlamoqda va imkon bo‘lsa, zaxira futbolchisi sifatida o‘ynashga ham tayyor. Agar yangi bitim imzolanmasa, Levandovski Yevropaning boshqa jamoasiga o‘tishni rejalashtirmoqda. Shu bois uning Saudiya Arabistoni ligasiga o‘tish ehtimoli past.

Manbada yozilishicha, nomzodlar orasida “Fenerbahche” yetakchi bo‘lib turibdi. Istanbul klubi polshalik hujumchini sotib olish orqali hujum chizig‘ini kuchaytirish hamda Turkiya Superligasi chempionlik poygasiga qaytishni rejalashtirmoqda. Shuningdek, futbolchining nomini “Milan” bilan ham bog‘lashmoqda. Jumladan, Zlatan Ibragimovich Robertning transferi ustida ishlayotgani aytilmoqda. “Atletiko” hamda “Manchester Yunayted” ham Levandovskini tekinga qo‘lga kiritishni istamoqda.

Ma’lumot uchun, joriy mavsum Levandovski “Barselona” safida jami 12 o‘yinda maydonga tushib, o‘z hisobiga 7 ta gol yozdirib qo‘ygan. Transfermarkt portali hujumchining qiymatini 10 million yevroga baholagan.

Eslatib o‘tamiz, polshalik futbolchi 2022 yil yozida “Bavariya”dan “Barselona” safiga 45 million yevro evaziga o‘tgan edi. U kataloniyaliklar bilan ikki marta La Liga chempioni bo‘ldi, shuningdek, Ispaniya kubogi va ikki marta Superkubokni qo‘lga kiritdi.