O‘zbekistonlik shaxmat Javohir Sindarov jahon kubogi yarim final bosqichi tay-brekdagi g‘alabadan keyingi intervyu berdi.

— Siz nafaqat FIDE Jahon kubogi finaliga, balki Nomzodlar turniriga ham yo‘llanma oldingiz. Hozir o‘zingizni qanday his qilyapsiz?

— Juda xursandman, lekin do‘stim uchun baribir biroz xafaman. Biz juda yaxshi kurashdik. Tay-brekdagi ikki rapid partiyada ham tayyorgarligim ancha yaxshi edi, shuning uchun yaxshi pozisiyalar oldim, deb o‘ylayman.

Klassik o‘yinda u juda mustahkam, yaxshi tayyorlangan. Agar ispancha, italyancha yoki boshqa debyutni tanlasam, bu o‘yinda yuta olamanmi yoki qiziqarli pozisiya chiqadimi, aniq bilmasdim. Shuning uchun tezroq durang qilish va hammasini rapid hamda blisda hal qilish varianti menga ma’qulroq tuyuldi. Chunki bu vaqt nazoratlarida o‘zimni biroz yaxshiroq his qilaman. Lekin baribir Nodirbek ham bu yerda o‘z darajasini ko‘rsatdi, juda yaxshi o‘ynadi. Men ozgina omadim kelganini ham his qilyapman. Nomzodlar turniriga yo‘llanma olganimdan juda baxtiyorman — bu mening joriy yilgi eng katta maqsadim edi. Endi keyingi turnirlarimda Nomzodlar uchun tayyorgarlikni boshlayman.

— Lekin Nomzodlargacha hali jahon kuboogi finali ham bor. Tay-brekni 2:0 hisobida yutgandan keyin final oldidan o‘zingizni qanchalik ishonchli his qilyapsiz?

— Hozir Vey Yi - Yesipenkoning o‘yini tugadi, Andrey bitta yurishda katta xato qildi. Har ikkisi ham juda kuchli shaxmatchi, Vey Yi bilan ancha ko‘p o‘ynaganman. Unga qarshi ham qo‘limdan kelganicha yaxshi shaxmat o‘ynashga harakat qilaman. Mening katta rejalarimdan biri Nomzodlar turniriga chiqish edi, uni bajardim, endi biroz tinchlanib, Vey Yiga qarshi finalga yaxshi kayfiyatda chiqishga harakat qilaman.

—O‘zingizdan tashqari bu yerda ukangizni ham ko‘ryapmiz. U aynan turnirning shu bosqichi uchun keldimi?
— Ha, ukam kecha kechasi keldi. U men uchun juda ko‘p shirinliklar, shokoladlar, milliy taomlarimizni ham olib keldi. Oilam ham bu yerda — bobom, buvim ham kelishgan. Juda xursandman, bunday paytda yaqinlarim yonimda bo‘lgani menga katta kuch beradi. Endi finalda ham qo‘limdan kelganicha eng yaxshi o‘yinimni ko‘rsatishga harakat qilaman.