Madridning "Real" klubi hujumchisi Kilian Mbappe La Liga doirasidagi "Elche"ga (2:2) qarshi o‘yinda gol ura olmadi.

"Qaymoqranglilar" 78 va 87-daqiqalarda Din Xyoysen hamda Jud Bellingemning aniq zarbalari evaziga mag‘lubiyatdan qutulib qolishdi. E’tiborlisi, Mbappe Xabi Alonso davrida ilk bor (va joriy mavsumda ham) "qaymoqranglilar" safida ketma-ket uchta bahsda gol ura olmadi. Avvalroq, fransuz "Rayo Valyekano" (0:0) va "Liverpul" darvozalarini ham (0:1) ishg‘ol qila olmagandi. Bu yulduz hujumchining aprel oyidan beri klubdagi eng uzoq davom etgan golsiz seriyasidir.

Qayd etish joiz, "Elche"ga qarshi o‘yinda Kilian samarali harakatlarsiz qolmadi: ikkinchi goldagi epizodda u assistent vazifasini bajardi.

Mbappe 13 ta aniq zarba bilan La Liga to‘purarlar poygasida hamon peshqadamlik qilmoqda.