Мадриднинг "Реал" клуби ҳужумчиси Килиан Мбаппе Ла Лига доирасидаги "Эльче"га (2:2) қарши ўйинда гол ура олмади.

"Қаймоқранглилар" 78 ва 87-дақиқаларда Дин Хёйсен ҳамда Жуд Беллингемнинг аниқ зарбалари эвазига мағлубиятдан қутулиб қолишди. Эътиборлиси, Мбаппе Хаби Алонсо даврида илк бор (ва жорий мавсумда ҳам) "қаймоқранглилар" сафида кетма-кет учта баҳсда гол ура олмади. Аввалроқ, француз "Райо Вальекано" (0:0) ва "Ливерпуль" дарвозаларини ҳам (0:1) ишғол қила олмаганди. Бу юлдуз ҳужумчининг апрель ойидан бери клубдаги энг узоқ давом этган голсиз сериясидир.

Қайд этиш жоиз, "Эльче"га қарши ўйинда Килиан самарали ҳаракатларсиз қолмади: иккинчи голдаги эпизодда у ассистент вазифасини бажарди.

Мбаппе 13 та аниқ зарба билан Ла Лига тўпурарлар пойгасида ҳамон пешқадамлик қилмоқда.