"Elche" bosh murabbiyi Eder Sarabiya Madridning "Real" klubiga qarshi o‘yinda (2:2) hakamning ishini tanqid qildi.

Uchrashuvning 53 va 84-daqiqalarida mezbonlar hisobda oldinga chiqib olishgan bo‘lsa-da, "qaymoqranglilar" har ikki vaziyatdan so‘ng hisobni tenglashtirishga muvaffaq bo‘lishdi.

Vinisius Junior va Inyaki Penya ishtirokidagi epizod alohida bahslarga sabab bo‘ldi: braziliyalik futbolchi madridliklarning ikkinchi goli oldidan darvozabonning yuziga tizzasi bilan to‘qnashib ketdi, biroq hakam o‘yin qoidasi buzilganini qayd etmadi.

"Bu o‘yindagi durang meni umuman qoniqtirmadi. Vinisius Penyaga qo‘pollik qildi. Darvozabonimizning yuziga zarba berildi - buni Inyakining burnidagi izdan ham bilsa bo‘ladi. Hakamlik yakuniy natijaga ta’sir qildi, men juda g‘azabdaman," - dedi Sarabiya o‘yindan keyingi intervyusida.

Aynan "Elche" darvozaboni Penya ikkita gol o‘tkazib yuborganiga qaramay, bellashuvning eng yaxshi futbolchisi deb topildi.