"Эльче" бош мураббийи Эдер Сарабия Мадриднинг "Реал" клубига қарши ўйинда (2:2) ҳакамнинг ишини танқид қилди.
Учрашувнинг 53 ва 84-дақиқаларида мезбонлар ҳисобда олдинга чиқиб олишган бўлса-да, "қаймоқранглилар" ҳар икки вазиятдан сўнг ҳисобни тенглаштиришга муваффақ бўлишди.
Винисиус Жуниор ва Иньяки Пенья иштирокидаги эпизод алоҳида баҳсларга сабаб бўлди: бразилиялик футболчи мадридликларнинг иккинчи голи олдидан дарвозабоннинг юзига тиззаси билан тўқнашиб кетди, бироқ ҳакам ўйин қоидаси бузилганини қайд этмади.
"Бу ўйиндаги дуранг мени умуман қониқтирмади. Винисиус Пеньяга қўполлик қилди. Дарвозабонимизнинг юзига зарба берилди - буни Иньякининг бурнидаги издан ҳам билса бўлади. Ҳакамлик якуний натижага таъсир қилди, мен жуда ғазабдаман," - деди Сарабия ўйиндан кейинги интервьюсида.
Айнан "Эльче" дарвозабони Пенья иккита гол ўтказиб юборганига қарамай, беллашувнинг энг яхши футболчиси деб топилди.
