"Andijon" - "Arkadag" (1:1) uchrashuvidan keyingi matbuot anjumanining ikkinchi qismida andijonliklarning vaqtinchalik bosh murabbiyi Akmal Shorahmedov va o‘yinning eng yaxshi futbolchisi Bektemir Abdumannonov savollarga javob qaytardilar.
Akmal Shorahmedov - Yutishni juda xohlagandik. Futbolchilar ham buni rosa istashgandi. Shunga yarasha harakat qildik. Qisqa vaqt bo‘lsa ham tayyorlandik. "Al-Ahli" va boshqasi ham bular bilan o‘yinlarda qiynalishyapti. Himoyada juda zich o‘ynashadi. Yorib o‘tish qiyin. Lekin men o‘yindan qoniqdim. Yechinish xonasida ham aytdim. Ayniqsa, menga ikkinchi taymdagi o‘yin yoqdi. Deyarli Turkmaniston terma jamoasi bilan o‘ynab, oxirida raqibni yotib olib va to‘pni tepib yuborayotgan holatlarini ko‘rish men uchun yoqimli bo‘ldi. Yigitlarga rahmat.
- Jamoaga nima yetishmadi, deb
o‘ylaysiz?
Bektemir Abdumannonov: - Jamoamiz bilan g‘alaba uchun chiqqandik. Oxirida biroz omadimiz yetishmadi, deb o‘ylayman. Hamma harakat qildi. O‘yingacha bo‘lgan jarayonlar ham yaxshi bo‘ldi. Hali imkoniyatimiz bor. Keyingi uchrashuvda yutsak 100 foiz keyingi bosqichga chiqishni hal qilamiz. O‘z xatoimiz orqali gol o‘tkazdik. Aslida raqibni har tomonlama yutdik. Bitta gol urganimizda yutib ketardik.
- O‘rtada deyarli bir oy tanaffus bo‘ladi. 24 dekabrgacha futbolchilarni holatini bir maromda ushlab turish uchun qanday rejalar tuzilyapti?
Akmal Shorahmedov: - "Bunyodkor" bilan o‘yindan keyingi rejalarni hali bilmayman. Menga faqat ushbu uchrashuvlarga tayyorlash aytilgan. Qolganini vaqt ko‘rsatadi. Meni vazifam "Andijon"ni saqlab qolish. Shunga harakat qilyapmiz. Butun jamoa - bazadagi ishchilar, matbuot, hammamiz bir oila bilan harakat qilyapmiz. Keyingi o‘yinni o‘ylaymiz. 24 dekabr kungi uchrashuv "Bunyodkor" bilan bahsdan keyin o‘ylanadi. Hozir bunga vaqtli.
- Jamoa g‘alabaga chanqoq o‘ynadi. Biroq bir nechta vaziyatlarda hakamlarni qarorlariga e’tirozlar bo‘ldi. O‘yinni boshqargan hakamga qanday baho berasiz?
Akmal Shorahmedov: - Bizga ham "simpatiya" qilganda yaxshiroq bo‘lardi. VAR yo‘q, hech narsani isbotlay olmaymiz. Nima bo‘lgan taqdirda ham gol ura oldik. Lekin gol ham o‘tkazib qo‘ydik. Lekin birinchi golimizni urdik, shundan xursandman.
- O‘yindan oldingi matbuot anjumanida 3 ta hujumchi bilan o‘ynaymiz, hujumga borgan o‘yinchi himoyani o‘ylamasligi kerakligini aytgandingiz. Qarshi hujumda raqib gol urib ketdi. Shu ikkita narsani bir-biriga bog‘lagan bo‘larmidingiz?
Akmal Shorahmedov: - Fikrim bo‘yicha, kim orqada turgan bo‘lsa o‘sha o‘ynab qo‘yishi kerak. Kim oldida turgan bo‘lsa u hujumda o‘ynab qo‘yishi kerak. Orqada turgan futbolchi himoyachimi yoki xujumchimi, raqib bilan o‘ynashi lozim. Hozir kimnidir aybdor qilish niyatim yo‘q. Tavakkal qilib, hujumga ketdik.
- Ikkinchi taymda zaxiradan himoyachi Islom Mamatkazinni hujumga tushirdingiz. Bu ham tavakkalmidi yoki oldindan o‘ylangan rejamidi?
Akmal Shorahmedov: - Oldindan o‘ylagan rejam edi. Yutayotganimizda Islom Mamatkazinni uchinchi himoyachi qilib tushirmoqchi edim. Chap taraf himoyada kimni qo‘yish bilan ushlanib qoldim. O‘sha paytni o‘zida gol o‘tkazib yubordik. Bizda boshqa hujumchi yo‘q. Shuning uchun Mamatkazinni hujumga qo‘ydim. Chunki o‘yinni oxiri, bo‘yi pastroq o‘yinchini tushirish to‘g‘ri kelmasdi. Oldindan unga aytgandim: yo uchinchi himoyachi bilan tushasan yoki hujumchi bo‘lib tushasan deya tayinlaganman.
- "Andijon"da o‘zgarishlar bo‘ldi, jamoa natijalari yaxshi emas. Futbolchilarda kayfiyat qanaqa? Tushkunlik bormi? Jamoa pley-offga tushib qolishi mumkin.
Bektemir Abdumannonov: - Bu narsa hammani bo‘yniga tushadi. Bu vaziyatdan chiqib ketishimiz kerak. Hali imkonimiz bor. Bitta uchrashuvga yaxshi tayyorgarlik ko‘rib, finalga chiqqandek chiqib yutgan holda keyingi bosqichga chiqsak bo‘ladi.
- Oxirgi turda rostdan ham Qatarda guruh favoritini yutishinglarga ko‘zingiz yetyaptimi?
Bektemir Abdumannonov: - Xudo xohlasa, g‘alaba uchun chiqamiz. Bitta o‘yinda hamma narsa hal bo‘ladi.
