Fransiyaning "Lion" klubi bosh murabbiyi Paulu Fonseka Yevropa ligasida Isroilning "Makkabi" klubiga qarshi kechgan g‘alabali o‘yin haqida fikr bildirdi. Uchrashuv 6:0 hisobida yakunlandi.

"Avvalo, 17 yoshgacha bo‘lgan o‘smirlar o‘rtasidagi jahon chempionatida g‘olib chiqqan Portugaliyani tabriklayman. Murakkab sharoitlarga qaramay, bizni qo‘llab-quvvatlash uchun kelgan muxlislarimizni ham e’tirof etmoqchiman", - deya murabbiyning so‘zlarini keltiradi klub sayti.

"Bu g‘alaba osondek ko‘rinishi mumkin, ammo biz chindan ham yaxshi o‘yin o‘tkazdik, deb o‘ylayman. Biz jiddiy edik va shuning uchun ajoyib o‘yin ko‘rsatdik. Odatda, ikkinchi bo‘limni 3ta to‘p farqi bilan boshlaganingda jamoalar biroz bo‘shashadi, lekin tanaffusda shunday davom etishlarini aytdim. Shuning uchun biz yana uch marta gol urdik", - deya qo‘shimcha qildi Fonseka.

Ushbu o‘yindan so‘ng "Lion" 12 ochko bilan musobaqa jadvalida peshqadamlik qilmoqda. "Makkabi" 1 ochko bilan 35-o‘rinda bormoqda.