Xabaringiz bor, joriy yilning 30 noyabr kuni milliy chempionatimizning navbatdagi, 34-mavsumi yakunlandi.

Ko‘pchilikni «Navbahor»ga oid statistik ma’lumotlar qiziqtirishini hisobga olib, sizlarni shunday ma’lumotlar bilan tanishtirishga ahd qildik.

Dastlab «lochinlar»ning milliy chempionatlarimizdagi umumiy statistikasi borasida to‘xtalamiz.

Ma’lumki, «Navbahor» milliy chempionatimizga asos solinganidan buyon Superliga (oliy liga)ning muntazam 2 ishtirokchisidan («Paxtakor» bilan birgalikda) biri hisoblanadi.

Ortda qolgan 34 ta chempionatda «Navbahor» 988 ta o‘yin o‘tkazib, 454 g‘alaba, 218 durang, 316 mag‘lubiyatni qayd etib, raqiblar darvozasiga 1585 ta gol urgan holda, o‘z darvozasidan 1144 ta to‘p o‘tkazib yuborgan.

Namanganliklarning 1992-2025 yillardagi chempionat bahslarida jamg‘argan jami ochkolari 1580 tani tashkil etmoqda.

Ortda qolgan milliy chempionatlarimiz tarixida shu paytgacha Superliga (oliy liga)da qatnashgan 40 ta jamoa orasida «lochinlar» umumiy ochkolar soni bo‘yicha faqatgina Toshkentning «Paxtakor» (jami ochkolari 2155) va Farg‘onaning «Neftchi» (jami ochkolari 1729) jamoalaridan ortda borishmoqda, xolos.

To‘rtinchi pog‘onadagi «Nasaf» (Qarshi) klubining umumiy ochkolari esa 1547 tani tashkil etadi.

Kelasi mavsumda ham «Navbahor» milliy chempionatlarimizdagi umumiy statistikasini ancha yaxshilaydi, degan umiddamiz hamda bu borada jamoamizga omad yor bo‘lishini tilab qolamiz.