Braziliya chempionati 37-turida «Juventude» — «Santos» uchrashuvi (0:3)da Neymar uchta gol urdi va 3,5 yildan beri ilk xet-trigiga erishdi. Bu safar 33 yoshli hujumchi 56, 66 va 73-daqiqalarda to‘p kiritib, jamoasiga yirik hisobdagi g‘alabani ta’minladi.
Neymar so‘nggi marta xet-trikni 2022 yil 9 aprel kuni, «PSJ» tarkibida «Klermon» darvozasiga uch marta to‘p kiritganida amalga oshirgan edi.
Shu bilan birga, braziliyalik forvardning golli seriyasi uch o‘yinga yetdi — bu davr oralig‘ida u beshta gol urdi. Joriy mavsumda esa Neymar «Santos» uchun barcha musobaqalarda 29 ta o‘yinda maydonga tushib, 11 ta gol va 4 ta golli uzatma qayd etdi.
Avvalroq u tizzasidagi menisk bilan bog‘liq jarohat ortidan mavsum yakunlanguncha o‘ynay olmasligi haqida xabarlar tarqalgandi. Biroq Neymarning o‘zi bu ma’lumotlar jiddiy emasligini aytgan edi.
Braziliya — A seriya, 37-tur
4 dekabr 2025 yil, payshanba. Kashias-du-Sul. «Alfredo Jakoni» stadioni.
Juventude — Santos — 0:3
Gollar: 0:1 — Neymar, 56', 0:2 — Neymar, 66', 0:3 — Neymar, 73'













