Madridning "Real" jamoasi vingeri Rodrigo ketma-ket golsiz o‘yinlar soni bo‘yicha klub tarixidagi eng yomon natijani yangiladi - bu aynan "Atletik"ka qarshi muhim o‘yinda (3:0) ro‘y berdi.

Rodrigo endi bu statistikada yaqqol birinchi o‘ringa chiqib oldi: endi u 31 o‘yindan iborat golsiz seriya bilan yakka peshqadam - 1351 daqiqa. Bungacha antirekord Mariano Diasga tegishli edi (30 o‘yin, 986 daqiqa).

"Atletik"ka qarshi o‘yinda Rodrigo zaxiradan maydonga tushdi va maydonda 13 daqiqa harakat qilib, bu safar ham gol kirita olmadi.

Rodrigo joriy mavsumda 16 ta o‘yinda maydonga tushdi, ammo biror marta ham raqib darvozasini ishg‘ol eta olmadi.

E’tiborlisi, braziliyalik futbolchi so‘nggi bor mart oyida - Chempionlar Ligasi 1/8 finalidan o‘rin olgan "Atletiko"ga qarshi o‘yinda gol urgandi.