"Inter" 9 dekabr kuni bo‘lib o‘tadigan Chempionlar ligasi 6-turidan o‘rin olgan "Liverpul"ga qarshi o‘yinda markaziy himoyachi Manuel Akanjidan foydalana olmasligi mumkin. Bu haqda Sky Sport xabar bermoqda.
Manbaga ko‘ra, yaqinda shveysariyalik futbolchida gripp alomatlari aniqlangan, shu sababli u "neradzurrilar"ning so‘nggi mashg‘ulotini o‘tkazib yuborgan. Seshanba kuni Akanji tibbiy ko‘rikdan o‘tadi, shundan so‘ng uning o‘yinda ishtirok etishi haqida qaror qabul qilinadi.
Joriy mavsumda himoyachi barcha musobaqalarda 17ta o‘yinda maydonga tushgan. Uning jamoasi 12 ochko bilan Chempionlar ligasi turnir jadvalida to‘rtinchi o‘rinda bormoqda.













