O‘zbekiston U-21 terma jamoasi Osiyo kubogiga tayyorgarlikni davom ettirmoqda. Bosh murabbiy Ravshan Haydarov yig‘in, tayyorgarlik va navbatdagi o‘rtoqlik o‘yinlari xususida fikr bildirdi.
"Osiyo kubogiga tayyorgarligimizning ilk bosqichi Toshkentda bo‘lib o‘tmoqda. Oldimizda 2 haftalik tayyorgarligimiz bor edi va uning birinchi haftasi yakuniga yetmoqda. Asosiy urg‘u futbolchilarning jismoniy tayyorgarligiga qaratildi. Safimizda og‘ir mavsumni o‘tkazgan o‘yinchilar bor. Ular har xil holatda kelishgan. Hozirda ularning holati o‘ziga keltirish bilan shug‘ullanyapmiz.
Tayyorgarlikning ikkinchi bosqichi doirasida 2 ta o‘rtoqlik o‘yinimiz bor. Iordaniya va Qatar U23 terma jamoalariga qarshi o‘yinlarda ishtirok etamiz. Bu bahslar o‘yinimizni shakllantirishga yordam beradi.
Osiyo kubogiga 2028 yilgi Olimpiadada ishtirok etishi mumkin bo‘lgan futbolchilar bilan yo‘l olamiz. Biz o‘zimizdan 2 yosh katta futbolchilarga qarshi o‘ynasak ham keyingi olimpiya sikliga shakllangan holda tajriba to‘plab borishni maqsad qilganmiz", — dedi Haydarov.













