Birlashgan Arab Amirliklarining Dubay shahrida Xalqaro Boks Assosiasiyasi tomonidan IBA Pro 13 professional boks turniri tashkil etildi.

Kechaning dastlabki janglaridan birida og‘ir vazn toifasi vakili, o‘zbekistonlik Madiyar Saidrahimov rossiyalik David Jukayevga qarshi ringga ko‘tarildi. 8 raundga mo‘ljallangan bahs to‘liq davom etdi va unda Saidrahimov hakamlar qaroriga ko‘ra g‘olib bo‘ldi. Ushbu natija Madiyar Saidrahimovning professional ringdagi uchinchi g‘alabasi bo‘lib qayd etildi. Saidrahimov prof boksda mag‘lubiyasiz odimlamoqda.

Turnirning asosiy janglaridan biri Rio Olimpiadasi chempioni, Jahon chempioni Shahobiddin Zoirov ishtirokida o‘tdi. U IBA Pro kamarini qo‘lga kiritish uchun venesuelalik Yoel Finolga qarshi ringga ko‘tarildi.

10 raund davom etgan muroasasiz bahs yakunida g‘olib hakamlar qarori bilan aniqlandi. Bo‘lingan qaror (93–97, 96–94, 95–98) Zoirov foydasiga hal bo‘lmadi va u o‘zining ikkinchi mag‘lubiyatini qabul qilib oldi.

Shahobiddin Zoirovning professional ringdagi ilk mag‘lubiyati ham aynan Yoel Finolga qarshi o‘tgan jangda qayd etilgan edi.

Ma’lumot uchun, Zoirov 2016 yilgi Rio Olimpiadasi yarim finalida Finolni mag‘lub etib, finalga yo‘l olgan va yakunda Olimpiya chempioniga aylangan.