Diyego Simeone boshchiligidagi "Atletiko" Ispaniya chempionatining 16-turida "Valensiya"ni mag‘lub etdi (2:1). Uchrashuv 13 dekabr, shanba kuni Madriddagi "Sivitas Metropolitano" stadionida bo‘lib o‘tdi.
55 yoshli Simeone uchun bu g‘alaba La Ligadagi murabbiy sifatidagi 324-g‘alaba bo‘ldi. U ushbu ko‘rsatkich bo‘yicha Migel Munyosni (323 g‘alaba) ortda qoldirib, ikkinchi o‘ringa ko‘tarildi. Reytingning birinchi pog‘onasini Luis Aragones (344 g‘alaba) egallab turibdi.
Simeone "Atletiko"ni 2011 yildan buyon boshqarib kelmoqda. Jamoa bilan birgalikda u ikki marta Ispaniya chempionligini qo‘lga kiritdi. La Liganing joriy mavsumida madridliklar 34 ochko bilan turnir jadvalida to‘rtinchi o‘rinda bormoqda.
